ԹԱԹՈՒԼ ԿՐՊԵՅԱՆ - 50 ամյակ

2015 թվական, 16 մայիս, շաբաթ: ՀՀ ԿԳՆ «Գյումրու No 3 ավագ դպրոց» ՊՈԱԿ-ում խինդն ու թախիծը միախառնվել, ձուլվել էին իրար: Դպրոցի կամարներից ներս նշելու էին Հայաստանի Ազգային Հերոս Թաթուլ Կրպեյանի 50-ամյակը: 26 գարուններ ապրած այս հայորդին, իր կյանքի գնով ապացուցեց, որ «լոկ այնտեղ է սխրանքն սկսվում, երբ վերջանում է ամեն մի հնար...»:

Համադպրոցական միջոցառմանը ներկա էին ինչպես դպրոցի աշակերտաուսուցչական հանրույթը, այդպես էլ հյուրեր համայնքից ու հասարակական կազմակերպություններից:
Հյուրերի մեջ էին նաեւ հերոսի կինը՝ Իրինա Բարսեղյան-Կրպեյանը եւ Զարեհ Եահնիեանը: Վերջինս, 1983 թվականին Պորտուգալիայի մայրաքաղաք Լիսաբոնի թուրքական դեսպանատան ներսում անձնազոհության գնով մարտիրոսված 5 ընկերներից մեկի՝ Սիմոնի եղբայրն է:

Միջոցառման ընթացքում դպրոցի տարբեր դասարաններից ներգրավված աշակերտները խոսեցին Թաթուլ անհատականության մասին: Ներկայացրեցին նրա բանաստեղծական ելեւէջներն ու դիտեցին մեծանուն հայորդու մասին պատմող ֆիլմն ու լսեցին նրա կենդանի ձայնը:

Միջոցառման ավարտին դպրոցի տնօրեն Գոհար Ալեքսանյանը տարվա ընթացքում աշակերտական միջոցառումների ժամանակ (օլիմպիական, դպրոցական, համաքաղաքային, հանրապետական եւ այլն...) լավագույն արդյունքը ցուցաբերած աշակերտներին հանձնեց այդ մասին վկայող պարգեւներով:

Միջոցառման կազմակերպչի՝ Դաստիարակության գծով կազմակերպիչ Մարիամ Մսրյանի խոսքով. - այս միջոցառումը ավելի շատ դաս էր, մեծ դաս էր, որտեղ պատանին սովորելով պիտի սովորեցնի, ու ապրելով պիտի ապրեցնի հայրենի հողի համար նահատակված Թաթուլներին ու իր հոգու մեջ տանելով հանձնի դարերին...